• Virtual qabıllawxana
  • Sayt kartasi
  • Saytqa kiriw

QARAQALPAQSTAN RESPUBLIKASÍNDA “MÁNAWIYAT FESTIVALÍ” ÓTKERILDI

Respublika Mánawiyat hám márifat orayı, “Márifat” úgit-násiyatshılar jámiyeti hám Qaraqalpaqstan Respublikası Mánawiyat hám márifat Keńesi tárepinen usı jıldıń 18-19-sentyabr kúnleri qaraqalpaq hám ózbek xalqı mánawiy-mádeniy miyrasınıń ózine tán ózgeshelikleri, jaqın tárepleri, márifiy áhmiyetin jarıtıw hám xalıq arasında mámleketimizde sońǵı jıllarda ámelge asırılıp atırǵan keń kólemli reformalardıń, dóretiwshilik jumıslarınıń mazmunı hám áhmiyetin úgit-násiyatlaw, ishki turizmdi rawajlandırıw, zamanagóy texnologiyalıq qurallardan nátiyjeli paydalanǵan halda milliy qádiriyatlar, tariyxıy estelikler haqqında maǵlıwmat berip, olardıń úgit-násiyatın kúsheytiw maqsetinde “Mánawiyat festivalı” ótkerildi.

Festival 18 sentyabr kúni Nókis qalasında boy tiklegen Berdaq Ǵarǵabay ulı háykeline gúl qoyıw máresimi menen baslandı. Soń Berdaq atındaǵı Qaraqalpaq mámleketlik universitetinde “Mánawiyat hám márifat hámde tálim-tárbiyanıń birligi” atamasında ilimiy-ámeliy seminar ótkerildi. Ilaj sheńberinde “Márifat” úgit-násiyatshılar jámiyetiniń Qaraqalpaqstan Respublikasındaǵı aǵzalarına gúwahnama hám aǵzalıq kókirek nıshanı tapsırıw máresimi bolıp ótti. Xalıq súygen atqarıwshılar tárepinen koncert baǵdarlaması qoyıp berildi.

 

Festivaldıń dáslepki kún ekinshi yarımında Arqa-batıs áskeriy okrugi Nókis gornizoni “Mánawiyat hám márifat orayı”nda “Watan muqaddes, onı qorǵaw ádiwli minnet!” súreni astında áskerler hám olardıń shańaraq aǵzaları menen tanıqlı pán, mádeniyat hám kórkem-óner xızmetkerleri qatnasıwında márifiy ushırasıw ótkerildi.

 

Sonday aq, “Márifat tur” joybarı sheńberinde I.V.Savickiy atındaǵı Qaraqalpaq Mámleketlik kórkem-óner muzeyine sayaxat hám “Qaraqalpaqstanda búgingi turizm” atamasında ushırasıw ótkerildi.

 

Festival sheńberinde “Belsendi puqara” debat klubı aǵzaları ushın oqıw-seminarı hám debat boyınsha turnirdiń Qaraqalpaqstan Respublikası basqıshı ótkerildi.

 

Qaraqalpaq mámleketlik Jas tamashagóyler teatrında dramaturg B.Aytmuratovtıń “Moynaqta baxıttıń tańları attı” spektakli qoyıp berildi.

 

Festivaldıń ekinshi kúninde Xojeli rayonındaǵı 1-sanlı Mehriybanlıq úyinde “Márifat” úgit-násiyatshılar jámiyeti aǵzaları qatnasıwında “Balalarǵa márifat berip” akciyası hám mánawiy-márifiy ilaj bolıp ótti.

 

Kúnniń ekinshi yarımında Moynaq rayonındadaǵı “Aral” hám “Tallı ózek” máhállelerinde “Shańaraq muqaddes dárgay” atamasında ushırasıwlar ótkerildi.

Soń festival qatnasıwshıları ushın rayondaǵı “Moynaq rayonı ekologiya muzeyi” hám “Kemeler qoyımshılıǵı”na sayaxat shólkemlestirildi. Moynaq rayonı mádeniyat orayında tanıqli jazıwshı-shayırlar hám jaslar qatnasıwında “Mádeniyat Moynaqtan baslanadı” súreni astında “5 áhmiyetli baslama – 5 imkaniyat” atamasında mádeniy-márifiy ilaj shólkemlestirildi. Ilaj sheńberinde kitap yarmarkası hám jańa kitaplar, súwretler kórgizbesi, atap aytqanda, qaraqalpaq folklorınıń 100 tomlıǵı kórgizbeleri, milliy libaslar kórgizbesi hám festivaldıń juwmaqlawshı koncert baǵdarlaması ótkerildi. Festival qatnasıwshılarına minnetdarshılıq hám estelik sawǵaları tapsırıldı.

 

Qaraqalpaq milletiniń ózine tán úrp-ádet hám qádiriyatları, sociallıq turmıs tárzin qatnasıwshılarǵa keń kórsete alǵan usı “Mánawiyat festivalı” barlıq qatnasıwshılarda úlken tásir qaldırdı.

 

Respublika Mánawiyat hám márifat orayı Qaraqalpaqstan bólimi

málimleme xızmeti